ബി.സി. ഒന്നാം നൂറ്റാണ്ടിനും ആറാം നൂറ്റാണ്ടിനും ഇടയില്‍ എഴുതപ്പെട്ടതെന്ന് കരുതുന്ന സംഘങ്ങളെ കൃതികളില്‍ ഏഴിമല ആസ്ഥാനമാക്കി വാണ നന്നനെപ്പറ്റി പരാമര്‍ശങ്ങളുണ്ട്. വയനാട് ഏറെക്കാലം ഏഴിമല രാജവംശത്തിന്റെ അധീനതയിലായിരുന്നു. അക്കാലത്ത് കേരളത്തിന് വിദേശരാജ്യങ്ങളുമായി വ്യാപാര ബന്ധങ്ങള്‍ ഉണ്ടായിരുന്നു. ഏലം, ദന്തം, പലതരം മുത്തുകള്‍, കുരുമുളക് എന്നിവ ഇവിടെ നിന്ന് കയറ്റി അയച്ചിരുന്നു. എ.ഡി. 900-ത്തിനും 1500-നുമിടയിലുള്ള ഇന്ത്യന്‍ ഭൂഖണ്ഡത്തെക്കുറിച്ച് സഞ്ചാരിയായ അല്‍ ഇദ്രിസി എഴുതുന്നു. “ഇവിടം (വയനാടന്‍ മലകളില്‍) പല ജാതി വൃക്ഷങ്ങള്‍ വളരുന്നു. ഏലം ഇവിടെ സമൃദ്ധമായി വളരുന്നു. ഇവിടെ നിന്ന് അവ ധാരാളമായി കയറ്റി പോകുന്നുണ്ട്.

മധ്യകാല മണിപ്രവാള കൃതിയായ ഉണ്ണിയച്ചി ചരിതത്തിലെ വിവരണമനുസരിച്ച് വയനാട്ടിലെ തിരുനെല്ലി പതിനാലാം നൂറ്റാണ്ടിന് മുമ്പു തന്നെ ദക്ഷിണേന്ത്യയിലെ എണ്ണപ്പെട്ട പട്ടണങ്ങളില്‍ ഒന്നായിരുന്നു. വയനാട്ടിലെ വേലിയമ്പത്തിനടുത്തുള്ള താഴേക്കാവില്‍ നിന്ന് ലഭിച്ച ശിലാശാസനവും തിരുനെല്ലി ക്ഷേത്രത്തിലെ ചെമ്പ് ശാസനവും തമിഴകവുമായുള്ള വയനാടിന്റെ പഴയകാലബന്ധം വ്യക്തമാക്കുന്നു.

സി.ഇ. 9 മുതല്‍ 12 വരെയുള്ള നൂറ്റാണ്ടുകളില്‍ മഹോദയപുരം ആസ്ഥാനമാക്കി കേരളം ഭരിച്ച ചേരരാജാക്കന്മാരുടെ കീഴിലായിരുന്നു. വയനാട് ഉള്‍പ്പെടുന്ന പുറൈക്കിഴാനാട്. ഭാസ്കര രവിവര്‍മ്മയുടെ തുരുനെല്ലി ശാസനത്തില്‍ പുറൈക്കിഴാനാടിനെ പറ്റി പരാമര്‍ശമുണ്ട്.

ക്രിസ്തുവര്‍ഷത്തിന്റെ ആദ്യശതകങ്ങളാവാം വീരക്കല്ലുകളുടെ കാലമെന്ന് പഠനങ്ങള്‍ തെളിയിക്കുന്നു. കന്നുകാലികളുടെയും കാടുകള്‍ താണ്ടി കടന്നു പോകുന്ന ഇടയ ജനതയുടെയും വണിക്കുകളുടെയും സംരക്ഷണത്തിനായി പ്രാചീന സമൂഹങ്ങള്‍ ആരാധിച്ചിരുന്ന വീരന്മാരുടെ വഴിപാട് ബിംബങ്ങള്‍ കാടുകളില്‍ സ്ഥാപിച്ചതാവാം ഇവയെന്ന് കരുതുന്നു. അമ്മനാട്ടക്കാരികള്‍, സര്‍വ്വാഭരണവിഭൂഷിതകളായ സ്ത്രീകള്‍, ഭൈരവമൂര്‍ത്തി, പത്മാസനത്തില്‍ ഇരിക്കുന്ന പുരുഷവിഗ്രഹം എന്നിങ്ങനെ വഴിപാട് ബിംബങ്ങള്‍ വയനാട്ടിലെമ്പാടുമുണ്ട്.