ഗോത്രവിഭാഗങ്ങൾക്ക് ആരോഗ്യവും ആയുസ്സും പ്രദാനം ചെയ്യുന്നതിന് തേനിന് വലിയ പങ്കുണ്ട്. തേൻകുറുമർ എന്നറിയപ്പെടുന്ന കാട്ടുനായ്ക്കർക്ക് ഏതു മരക്കൊമ്പിലും ഉള്ള തേനും വളരെ വേഗത്തിൽ കണ്ടെത്തുവാനുള്ള പ്രത്യേക കഴിവുണ്ട്. കർഷകവിഭാഗങ്ങൾ പുനംകൃഷിയിലെ മുഖ്യമായ തിനയരി വറുത്തുപൊടിച്ച് അതിന്റെ കൂടെ തേൻ ചേർത്ത് കഴിക്കുന്നു. വൻതേൻ, ചെറുതേൻ, കരിന്തേൻ, പുറ്റുതേൻ തുടങ്ങിയ പലതരത്തിലുള്ള തേനുകൾ ഇവർ ശേഖരിക്കുന്നു.

വയനാടൻ ഗോത്രവർഗ്ഗങ്ങളുടെ പ്രധാന ഭക്ഷണങ്ങളിലൊന്നാണ് കാട്ടുകിഴങ്ങുകൾ. പഞ്ഞമാസങ്ങളിലേക്ക് സംരക്ഷിച്ചു വയ്ക്കുന്ന മുഖ്യ ആഹാരവും ഇതുതന്നെയാണ്. ഇടതൂർന്ന വനപ്രദേശത്ത് വളരെ ആഴത്തിൽ വേരൂന്നിയ കിഴങ്ങുകൾ, ജലാംശം കൂടുതലുള്ളതും നാര് കുറവായതുമായ കിഴങ്ങുകൾ, മുള്ളുള്ള മധുരക്കിഴങ്ങുകൾ, പാറപ്പുറത്ത് മണ്ണിൽ പറ്റിപ്പിടിച്ചു വളരുന്ന കിഴങ്ങുകൾ, നാരില്ലാതെ ഒറ്റയായി കാണുന്ന കിഴങ്ങുകൾ, ചേനകൾ, ചേമ്പുകൾ എന്നിങ്ങനെ വിവിധയിനം കിഴങ്ങുകൾ ഭക്ഷണമായി ഇവർ ഉപയോഗിക്കുന്നു.

ഗോത്രവിഭാഗങ്ങൾ കാടുകളിൽ നിന്നും പലതരത്തിലുള്ള കാട്ടുപഴങ്ങൾ ശേഖരിച്ച് ഭക്ഷണമായി ഉപയോഗിച്ചു വരുന്നു. ഓരോ കാലാവസ്ഥയിലും ഉണ്ടാകുന്ന പഴങ്ങൾ, കാട്ടിൽ ഇവ കാണപ്പെടുന്ന പ്രദേശങ്ങൾ, പഴങ്ങളുടെ മൂപ്പ് തുടങ്ങിയ കാര്യങ്ങളിൽ ഉള്ള അറിവ് കാടുമായുള്ള ഇടപെടലുകൾ മൂലം ഇവർ ആർജ്ജിച്ചെടുക്കുന്നു.

തോടിന്റെയും പുഴയുടെയും വയലുകളുടെയും കരയിൽ വളരുന്ന നിരവധി ഇല വർഗ്ഗങ്ങൾ ഗോത്രജനതയ്ക്കും ആരോഗ്യം പ്രദാനം ചെയ്യുന്ന ഭക്ഷ്യവസ്തുക്കളാണ്. ഇലവർഗ്ഗങ്ങൾ ഏറെയും എളുപ്പം അരിഞ്ഞെടുക്കാവുന്നതും ഇളം മധുരമുള്ളതും രുചിപ്രദവുമാണ്.

അപൂർവ്വമായി ലഭിക്കുന്നതെങ്കിലും അതിവിശിഷ്ടമായ ആഹാരമാണ് മുളയരി. മുള ഒരിക്കലേ പൂക്കുകയുള്ളൂ. പൂത്ത് നെല്ലുണ്ടാകുന്നതോടുകൂടി മുള നശിച്ചുപോവുകയും ചെയ്യുന്നു. മുള പൂത്ത് അരിയാകുന്ന സമയത്ത് ഓരോ മുളങ്കൂട്ടത്തിന്റെയും ചുവട് അടിച്ചു വൃത്തിയാക്കിയിട്ടാണ് അരി ശേഖരിക്കുന്നത്. മുളയരി ഉപയോഗിച്ച് കഞ്ഞി, പുട്ട് എന്നിവയുണ്ടാക്കുന്നു. ചുരയ്ക്കതോടിനുള്ളിലും മുളംപാത്രങ്ങളിലും അരി ശേഖരിച്ച് വയ്ക്കുന്നു.

ഔഷധഗുണമുള്ള പല പയറുവർഗ്ഗങ്ങളും ഗോത്രവർഗ്ഗക്കാരുടെ ഭക്ഷണങ്ങളിൽ ഉൾപ്പെടുന്നു. തുവര, അമര, കാടങ്കോടി പയർ, പറണ്ടക്കായ്, വാളങ്ങ തുടങ്ങിയവ ഇവയിൽ ചിലതാണ്. ചിലയിനം പയറുകളുടെ കിഴങ്ങുകളും ഇവർ ഭക്ഷിക്കുന്നു.

കൃഷി ചെയ്തെടുക്കുന്ന നെല്ലിനങ്ങൾ, ചോളം, ചാമ, തിന, റാഗി എന്നിവയാണ് വയനാടൻ ഗോത്രവിഭാഗങ്ങൾ ഉപയോഗിക്കുന്ന പ്രധാന ധാന്യങ്ങൾ. മുത്താറി, പഞ്ഞപ്പുല്ല് എന്നീ പേരുകളിലാണ് റാഗിയെ ഗോത്രവിഭാഗങ്ങൾ വിളിക്കുന്നത്. കുറിച്യർ മുത്താറിക്കല്ലിൽ മുത്താറി പൊടിച്ചെടുത്ത് ദോശയും റൊട്ടിയും ഉണ്ടാകുന്നു. മുത്താറിപ്പിട്ട് കുറിച്യരുടെ വംശീയഭക്ഷണമാണ്.

കാടുകളിൽ നിന്നും പാകമായ പന കണ്ടെത്തി വെട്ടി പുറംതോട് കളഞ്ഞശേഷം ഉള്ളിലെ കാമ്പ് ഇടിച്ച് പൊടിച്ച് വെള്ളത്തിൽ കലക്കി ആ വെള്ളം അരിച്ചെടുത്ത് കലത്തിനടിയിൽ അടിഞ്ഞുകൂടുന്ന ഊറ് ഉണക്കിയെടുക്കുന്നതാണ് പനമ്പൊടി. പുട്ട്, കുറുക്ക് തുടങ്ങിയവ ഉണ്ടാക്കാൻ പനമ്പൊടി ഉപയോഗിച്ചിരുന്നു. പനംപുട്ട് മുള്ളുകുറുമരുടെ വംശീയ ഭക്ഷണമാണ്. ഈന്തിന്റെ കുരുവും ഭക്ഷ്യയോഗ്യമാണ്. പഞ്ഞകാലങ്ങളിലേക്ക് സൂക്ഷിച്ചു വയ്ക്കുന്ന ഭക്ഷ്യവസ്തുവും കൂടിയാണ് ഈന്തുംകായ്.

പക്ഷികൾ, അണ്ണാൻ, ചെറുമൃഗങ്ങൾ, മീനുകൾ എന്നിവയെ വേട്ടയാടുവാൻ അമ്പും വില്ലും ഉപയോഗിച്ചിരുന്ന പതിവ് ഗോത്രസമൂഹങ്ങളിൽ ഉണ്ട്. കുറിച്യർ, മുള്ളുകുറുമർ തുടങ്ങിയവർ തുലാം പത്തിനു നടത്തുന്ന നായാട്ട് വളരെ പ്രധാനപ്പെട്ടതായിരുന്നു. മീനുകളെ ബേട്ടക്കുറുമർ ഉണക്കിയും ഉപയോഗിക്കുന്നു.