വയനാടൻ ഗോത്രക്കാർ പരമ്പരാഗത രീതിയിൽ പ്രസവം നടത്തുന്നത് ഈറ്റുപുരയിലാണ്.പ്രസവിക്കുന്നതിനു മുമ്പ് ദൈവത്തെ കാണുന്ന ചടങ്ങുണ്ട്. വയറ്റാട്ടിമാരുടെ സഹായം ഇക്കാലത്തുണ്ട്. പതിനഞ്ചാം ദിനം കുളി എന്നൊരു ചടങ്ങുണ്ട്. കുറുമ വിഭാഗത്തിൽ ഒരാൺകുഞ്ഞ് ജനിച്ചാൽ അവർക്ക് സമീപം ഒരു അമ്പ് വയ്ക്കുക പതിവാണ്. അതുപോലെ പെൺകുട്ടിയാണ് ജനിക്കുന്നതെങ്കിൽ അരിവാൾ ആയിരിക്കും വയ്ക്കുന്നത്.

അടിയ വിഭാഗത്തിൽ തിരണ്ട് കല്യാണങ്ങൾ മഞ്ചള് നീര് ചൊല്ല്, നിറ കല്യാണം എന്നിങ്ങനെ അറിയപ്പെടുന്നു. കാട്ടുനായിക്ക വിഭാഗത്തിൽ നറുദത് എന്ന പേരിലാണ് ഇത് അറിയപ്പെടുന്നത്. വീട്ടിൽ നിന്നും അല്പം മാറി ഗുഡ എന്ന കുടിൽ കെട്ടി ഉണ്ടാക്കി പെൺകുട്ടിയെ അതിൽ താമസിപ്പിക്കുന്നു. കുറിച്യവിഭാഗങ്ങൾ ഈറ്റുപുരയിലാണ് പ്രായപൂർത്തിയായ പെൺകുട്ടികളെ പാർപ്പിക്കുന്ന ചടങ്ങ് നടത്തുക. ഗോത്രവിഭാഗങ്ങൾ പെൺകുട്ടികൾക്ക് പാരിതോഷികം നൽകുന്ന ചടങ്ങുകളും തിരണ്ടുകല്യാണത്തോടനുബന്ധിച്ച് നടത്താറുണ്ട്.

അടിയരുടെ കുഴിമാടത്തിന് കിടക്കെ കണ്ടി എന്നാണ് പറയാറ്. മുള തല്ലി ഉണ്ടാക്കുന്ന കട്ടിലിലാണ് ജഡം കിടത്തുക. ശവം മറവു ചെയ്തശേഷം നദിയിൽ കുളി കഴിഞ്ഞ് എല്ലാവരും വീട്ടിലേക്ക് തിരിക്കുന്നതിന് മുമ്പായി വള കൊടുക്കൽ നടത്തും. മരിച്ചതിന്റെ അടുത്ത ദിവസം കുറി പുല നടത്തും. കാട്ടുനായ്ക്കർ മൃതദേഹത്തിനൊപ്പം മരിച്ചയാൾ ഉപയോഗിച്ചിരുന്ന വസ്ത്രം, ആയുധം, പാത്രങ്ങൾ മുതലായവയും മറവു ചെയ്യും. മരിച്ചതിന്റെ ഏഴാം നാൾ പുല തീർക്കൽ ഉണ്ട്. കുറുമ വിഭാഗങ്ങൾക്കും ചുടലയുണ്ട്. പായയിൽ മൂടിയ മൃതദേഹം ഒരു മുളയിൽ കെട്ടി തൂക്കി രണ്ടഗ്രവും ആളുകൾ ചേർന്ന് പിടിച്ചാണ് ചുടലയിൽ കൊണ്ടു പോകുന്നത്. മൃതദേഹത്തിന് അരികിൽ അമ്പ്, വില്ല്, കത്തി, അരിവാൾ എന്നിവ വയ്ക്കാറുണ്ട്. മരിച്ചതിന്റെ അഞ്ചാം നാളിനോ ഏഴാം നാളിനോ അടിയന്തിരം നടത്തും.